ठाकुरबाबा उद्योग वाणिज्य सङ्घको अध्यक्षमा गणेश कुँवर निर्वाचित

भुरीगाउँ, बर्दिया : ठाकुरबाबा उद्योग वाणिज्य सङ्घको नयाँ कार्यसमिति चयनका लागि भएको निर्वाचनबाट गणेश कुँवर अध्यक्ष पदमा निर्वाचित हुनुभएको छ । उद्योग वाणिज्य सङ्घ ठाकुरबाबाको दोस्रो अधिवेशनमा अध्यक्ष लगायतका मुख्य पदमा सहमति हुन नसकेपछि निर्वाचन प्रक्रियाबाट चयन गरिएको निर्वाचन समितिका संयोजक यज्ञ प्रसाद नेपालले जानकारी दिनुभयो ।

बुधवार सम्पन्न निर्वाचनमा अध्यक्ष पदमा  गणेश कुँवर निर्वाचित हुनुभएको हो । कुँवरले निकटतम प्रतिस्पर्धी गोविन्द प्रसाद आचार्यलाई २३ मतान्तरले पछि पार्दै १९४ मत प्राप्त गरी अध्यक्ष पदमा विजयी हुनुभएको निर्वाचन समितिका संयोजक यज्ञ प्रसाद नेपालले बताउनुभयो ।

गणेश कुँवरले १९४ मत प्राप्त गर्दा उहाँका प्रतिस्पर्धी गोविन्द प्रसाद आचार्यले १७१ मत प्राप्त गर्नुभयो ।

यस्तै प्रथम उपाध्यक्षमा महेन्द्र पङ्गेनीले १८८ मत प्राप्त गरी निर्वाचित हुनुभएको छ । उहाँका प्रतिस्पर्धी खडानन्द सापकोटाले १५७ मत प्राप्त गर्नुभयो । द्वितीय उपाध्यक्षमा प्रेम बहादुर खड्काले सरस्वती शर्मालाई ४५ मतले पछि पार्दै १८८ मतका साथ निर्वाचित हुनुभएको छ । सरस्वती शर्माले १४३ मत ल्याउनुभयो ।

यसै गरी महासचिवमा दिनेश शाहीले १ सय ५६ ल्याउँदा गोपाल निरौलाले १ सय ७० मत प्राप्त गरी १४ मत बढी ल्याएर निर्वाचित हुनुभएको छ । कोषाध्यक्षमा तेज कुमारी थापाले १ सय ५० ल्याउँदा सावित्री पाण्डेले १८४ मतका साथ निर्वाचित हुनुभएको निर्वाचन समितिका संयोजक यज्ञ प्रसाद नेपालले बत्ताउनुभयो ।

कुल ४ सय ५६ जना मतदाता रहेकोमा मतदान हुँदा ३ सय ७८ मत खसेको थियो । जसमध्ये ५ मत बदर भएको निर्वाचन समितिले जनाएको छ । ठाकुरबाबा उद्योग वाणिज्य सङ्घको नयाँ कार्यसमितिमा अध्यक्ष गणेश कुँवर, प्रथम उपाध्यक्ष महेन्द्र पङ्गेनी, द्वितीय उपाध्यक्ष प्रेम बहादुर खड्का, महासचिव गोपाल निरौला र कोषाध्यक्ष सावित्री पाण्डे निर्वाचन प्रक्रियाबाट निर्वाचित भएसँगै यसअघि तृतीय उपाध्यक्षमा पूर्णबहादुर थापा, सचिवमा मिनराज तिमिल्सैना, सदस्यहरूमा देवीराम चौधरी, लक्ष्मी पौडेल पाण्डे, गोपीराम थारु, गणेश खनाल र धनिराम रिजाल निर्विरोध निर्वाचित हुनुभएको छ ।

नवनिर्वाचित पदाधिकारीहरूलाई प्रमाण वितरण गर्दै ठाकुरबाबा नगरपालिकाका उपप्रमुख बिनाकुमारी भट्टराईले नवनिर्वाचित पदाधिकारी सदस्यलाई बधाई ज्ञापन गर्दै उद्योग वाणिज्य सङ्घ र नगरपालिकाले विभिन्न क्षेत्रमा सँगसँगै कार्य गरिरहेको र आगामी दिनमा समेत सहकार्य हुँदै अघि बढ्ने बिचार राख्नुभयो ।

 निर्वाचन समितिका संयोजक यज्ञ प्रसाद नेपालको अध्यक्षतामा भएको प्रमाणपत्र वितरण समारोहमा ठाकुरबाबा उद्योग वाणिज्य सङ्घका निवर्तमान अध्यक्ष गोविन्द आचार्यले निर्वाचित टिमलाई बधाई दिँदै निर्वाचन सम्पन्न मर्ने सहयोग गर्ने सबैमा धन्यवाद दिनु भएको छ ।यस्तै नवनिर्वाचित अध्यक्ष गणेश कुँवरले सबैको साथ लिएर अघि बढ्ने प्रतिबद्धता व्यक्त गर्नुभयो ।