मानवअधिकार उल्लङ्घन तथा ज्यादतीका घटनामा बृद्दि

काठमाण्डाै : सन् २०२३ मा मानव अधिकार उल्लङ्घन तथा ज्यादतीको घटनामा ९ हजार ३८८ जना पीडित भएका छन् । अनौपचारिक क्षेत्र सेवा केन्द्र (इन्सेक) ले नेपाल मानव अधिकार वर्ष पुस्तक २०२४ सार्वजनिक गर्दै सन् २०२३ मा मानव अधिकार उल्लङ्घन तथा ज्यादतीको घटनामा ९ हजार ३८८ जना पीडित भएको तथ्याङ्क हिजो सार्वजनिक गरेको हो ।

सन् २०२३ अर्थात २०७९ पुस १७ देखि २०८० पुष १५ गतेसम्म मानव अधिकार उल्लङ्घनका घटनामा १४६ जना महिला र ८४२ पुरुष गरी जम्मा ९८८ जना पीडित भएको इन्सेकको प्रतिवेदनमा उल्लेख छ । त्यसैगरी ज्यादतीका घटनामा ७ हजार ७१६ महिला र ६८२ जना पुरुष पीडित भएको तथ्याङ्क छ । इन्सेकले सन् २०२२ मा मानव अधिकार उल्लङ्घन र ज्यादतीका घटनामा ७ हजार ३७६ जना पीडित भएको उल्लेख गर्दै सन् २०२३ मा यो सङ्ख्या सन् २०२२ भन्दा २ हजार १२ जनाभन्दा बढी भएको जनाएको छ ।

यसैबीच, सन् २०२३ को मानव अधिकार उल्लङ्घन सूचकाङ्कमा बाग्मती प्रदेशमा मानव अधिकारको अवस्था सबैभन्दा खराब देखिएको छ भने सुदूरपश्चिम प्रदेश उत्कृष्टमा पर्न सफल भएको छ । सूचकाङ्कमा ८५ दशमलव २४ अङ्कसहित बाग्मती सबैभन्दा खराब अवस्थामा रहेको तथ्याङ्कले देखाएको छ ।

त्यसपछि मधेसको ६४ दशमलव ३९, कोशीको ४९ दशमलव ८१, लुम्बिनीको ४२ दशमलव १२, कर्णालीको ३१ दशमलव २५, गण्डकीको १६ दशमलव ३६ र सुदूरपश्चिमको ९ दशमलव ५१ अङ्क रहेको सूचकाङ्कमा समावेश गरिएको छ । उज्यालोबाट साभार