बर्दियाको गुलरियामा खुकुरी प्रहार हुँदा एक युवकको ज्यान गयो
बर्दिया : सदरमुकाम गुलरियामा खुकुरी प्रहारबाट एक जना युवकको ज्यान गएको छ । खुकुरी प्रहारबाट गुलरिया नगरपालिका वडा नम्बर ६ का २३ वर्षीय बरुण घिमिरेको ज्यान गएको हो ।
गएराती खुकुरी प्रहारबाट गम्भीर घाइते भएका घिमिरेलाई उपचारका लागि अस्पताल लैजाने क्रममा ज्यान गएको जिल्ला प्रहरी कार्यालय बर्दियाका सूचना अधिकारी डिएसपी तुल्सीराम अर्यालले जानकारी दिनुभयो ।
गुलरिया नगरपालिका-५, सुहेलवामा गएराति एक बजेतिर दुई समूहबीच झगडा हुँदा खुकुरी प्रहार भएको थियो । झगडामा संलग्न तथा खुकुरी प्रहार गर्ने व्यक्ति यकिन भइसकेको र फरार रहेकाले उनीहरुको खोजी भइरहेको डिएसपी अर्यालले बताउनुभयो ।
