लागुऔषध (ब्राउन सुगर) सहित बढैयातालबाट दुई जना पक्राउ
बर्दिया : लागु औषध (ब्राउन सुगर) सहित बढैयाताल गाउँपालिका–८, कण्ठपुरबाट दुई जना पक्राउ परेका छन् । लागुऔषधको कारोबार भईरहेको छ भन्ने विशेष सूचनाको आधारमा जिल्ला प्रहरी कार्यालय बर्दिया मातहत इलाका प्रहरी कार्यालय मैनापोखरबाट खटिएको प्रहरी टोलीले भदौ ५ गते विहान ८ः५५ बजे उनीहरुलाई पक्राउ गरेको हो ।
पक्राउ पर्नेमा बर्दिया जिल्ला गुलरिया नगरपालिका वडा नम्बर ६ बस्ने वर्ष ४२ को हेमराज गिरी र सोहि ठाउँका वर्ष ३७ को सफल ज्ञवाली रहेको जिल्ला प्रहरी कार्यालय बर्दियाले जनाएको छ । उनीहरुको साथबाट प्लाष्टिकको पुरिया बनाई राखेको ६१० मिलिग्राम ब्राउन सुगर संगै भे. ११ प ४२७८ नम्बरको १५० सीसी पल्सर मोटरसाइकल प्रहरीले बरामद गरेको छ ।
पक्राउ परेका दुई जनाको विरुद्धमा लागुऔषध सम्बन्धी शिर्षकमा मुद्दा दर्ता गरेर बर्दिया जिल्ला अदालतबाट म्याद थप गरी घटनाको अनुसन्धान भई रहेको जिल्ला प्रहरी कार्यालय बर्दियाका सूचना अधिकारी प्रहरी नायव उपरीक्षक हिक्मत बहादुर बोहराले जानकारी दिनुभयो । पछिल्लो समय बर्दियामा ब्राउन सुगरको कारोबारीहरुलाई पक्राउ गर्न बर्दिया प्रहरीले सफलता पाई रहेको छ ।
