[गजल] …बिहे गरेकै दिन
स्वीकार्यौ प्रेम प्रस्ताव, बिहे गरेकै दिन ।
दियौ दिलमा डेरा, बसाइँ सरेकै दिन ।
साथी हुँ म भन्थौं, रहेछौ बडो घाती,
गर्यौ घात म संग, दुस्ख परेकै दिन ।
बाचुन्जेल बुबालाई, बुबा भन्दैनथ्यो,
ऊ बन्यो आज बुबा, बुबा मरेकै दिन ।
डरलाग्दो थियो खोलो, उर्लिई रहेको,
पठाई दियौ डुङ्गा, खोलो तरेकै दिन ।
सुरक्षाको निम्ति, अंगरक्षक बोलाएको,
आई पुग्यो अंगरक्षक, इज्जत हरेकै दिन ।।
✍︎ सुमन सिंगल
गौरादह–४, परिवर्तन टोल, झापा
