निजामती कर्मचारी युनियनको स्थापना दिवसमा ठाकुरबाबामा वृक्षारोपण
भुरीगाउँ, बर्दिया : नेपाल निजामती कर्मचारी युनियनको स्थापना दिवसको अवसरमा वृक्षारोपण गरिएको छ । नेपाल निजामती कर्मचारी युनियनको आयोजनामा स्थापना दिवसको अवसर पारेर ठाकुरबाबा नगरपालिका वडा नम्बर ६ को शिवपुर स्वास्थ्य चौकी परिसरमा वृक्षारोपण गरिएको हो ।
फलफूलका विरुवाहरु, धुपीसल्ला, गेट फूल, ज्यामुन, कागती लगायतका झण्डै ८० वटा विरुवाहरु रोपिएको नेपाल निजामती कर्मचारी युनियन ठाकुरबाबाका अध्यक्ष बल बहादुर पोखरेलले जानकारी दिनुभयो ।
ठाकुरबाबा नगरपालिकाका नगरप्रमुख तिलकराम लम्सालले विरुवाहरु रोप्दै वृक्षारोपण कार्यक्रमको उद्घाटन गर्नु भएको थियो । उद्घाटन कार्यक्रममा नगरप्रमुख लम्सालले समुन्नत ठाकुरबाबा सवल नगरबासी बनाउने नगरपालिकाको अभियानमा सबै नगरबासीहरुको भुमिका महत्वपुर्ण हुने भएकाले कर्मचारीहरुले सहयोग गर्न आग्रह गर्नुभयो ।
कार्यक्रममा बोल्दै नगरप्रमुख लम्सालले जिल्लाभर रहेका सम्पूर्ण लोकतान्त्रिक विचार लिएर अगाडी बढ्ने कर्मचारीहरु एकजुट भएर स्थानीय सरकारलाई सफल बनाउन लागि पर्न आग्रह गर्दै आफु सँधै कर्मचारीहरुको हित चाहने भएकाले काम गर्ने क्रममा कुनै समस्या आएमा आफु समक्ष कुरा राख्न पनि ठाकुरबाबा नगरपालिका अन्तरगतका कर्मचारीहरुलाई अनुरोध गर्नुभयो ।
नेपाल निजामती कर्मचारी युनियन जिल्ला कार्य समिति बर्दियाका अध्यक्ष द्रोणराज शर्माको अध्यक्षतामा सम्पन्न भएको वृक्षारोपण कार्यक्रममा ठाकुरबाबा नगरपालिकाका नगर प्रमुख तिलकराम लम्सालको प्रमुख आतिथ्यता रहेको थियो ।
